Komishanka Doorashooyinka Iyo Axsaabta Siyaasadda Somaliland Oo Maanta Si Wada Jir Ah Saxeexay Xeerka Anshaxa Doorashada Golaha Deegaanka

September 13, 2012 - Written by reporter1 - Edited byreporter1

 

 

Komishanka Doorashooyinka, Ururrada iyo Axsaabta Siyaasada Somaliland ayaa si wada jir ah u saxeexay Xeerka Anshaxa Doorashooyinka Goleyaasha Deegaanka (Code Of Conduct).

Shir ay maanta wada yeesheen Komishanka, Ururada Siyasada iyo Axsaabta oo dhacay Hotel Maansoor ee Magaaladda Hargeysa ayaa waxa ka soo qayb-galay Saddexda Xisbi qaran ee UDUB , Kulmiye Iyo UCID, halka ay Ururada Siyaasada-na ay ka soo xaadireen Xaqsoor, Wadani, Umadda, Dalsan iyo Nasiye iyo Ururada Caalamiga ah ee ka shaqeeya arrimaha Doorashooyinka Somaliland.

Ugu horayn Guddoomiyaha Komishanka Doorashooyinka Qaranka Somaliland Eng. Ciise Yuusuf X. Maxamed (Ciise-xamari) oo Shirkaas ka hadlay waxa hadalkiisii ka mid ahaa “Waxaan u mahad naqayaa Xisbiyada iyo Ururada ka soo qayb-galay inay saxeexaan Xeerhoosaadkan doorashadda, waxa kale oo aan mahad naq siinayaan Ururada  caalamiya ah ee iyaguna inala fadhiya RI ka mid tahay iyo kuwa guddaha ah ee inala jooga-ba ee Akaadamiyaddu ka mid tahay, waxa xeer-hoosaadkan muhiimadiisa ugu weyni tahay hab-dhaqanka ololaha Doorashadda oo ay ka mid tahay in loo sinaado Warbaahinta Dawladda, ta madaxbanaan  Warbaabinta kale lafteeda in si cadaalad ah ay u ogolaadaan xubnaha cidii wakhti ka iibsanaysa si siman inay  uga iibin karto dhamaan ururadda ama xisbiyadda, waxa ka mid ah in Hantidda iyo Gaadiidka dawladda in cidina si gaar ah u isticmaalin waxa ka mid ah in Komishanku balan-qaaday inuu Wareegto ka soo saarayo Madaxweynaha aanu shalay ka kulanay Madaxweynaha Xalayna ay soo baxday Wareegtadaasi, Waajibka kale ee saaran ee Xeerhoosaadkana waxa ka mid ah inuu sameeyo Guddi-hoosaad daba-gasha habsami u socdka Doorashadda”

Guddoomiyaha urur Siyaasadeedka Dalsan Ismaaciil Aadan Cismaan (Ismaaciil-yera) oo Shirkaasi ka hadlay  ayaa sheegay inay diyaar u yihii sexeexida xeerka anshaxa doorashada golaha deegaanka, waxaanu yidhi “ Haddii aanu nahay Ururka Dalsan waxaanu diyaar u nahay in aanu fulin dhamaan wixii shuruuc ah ee yaala Dalka kuna dhaqano,  xeerkaa anshaxa doorashada diyaar baanu u nahay in aan u saxeexno”

Guddoomiyaha Ururka Wadani Cabdiraxmaan Maxamed Cabdilaahi oo isna halkaas ka hadlay ayaa sheegay inay diyaar u yahay saxeexida xeerka anshaxa doorashada goleyaasha deegaanka Somaliland, waxaanu “Waxaan halkan ka cadynayaa aniga oo ka wakiil ah in aanu diyaar u nahay oo aanu ku dhaqano Shuruucda  doorashadda jamhuuryadda Somaliland, waxaanan faraynaa taageerayaashayadda inay ku dhaqmaan shuruucdaas waxaanu faraynaa inay anshaxa iyo nabad-galyadaba ilaaliyaan. Waxa kale oo aanu diyaar u nahay in aanu la shaqayno dhamaan ururadda iyo axsaabta Somaliland, waxaanu diyaar u nahay in aanu la shaqayno Guddida Doorashooyinka Qaranka iyo hay’addaha kale ee ay khusayso arrinta doorashaddu, waxaanan diyaar u nahay in aanu saxeexno heshiiskan anshaxa doorashadda”

Guddoomiye ku xigeenka koowaad ee Xisbiga talada haya ee Kulmiye Muj. Maxamed Kaahin Axmed oo Shirkaas ka hadlay, waxa uu yidhi “Xisbiga Kulmiye wuxuu diyaar u yahay inuu xeerkaas uu maanta halkan ku saxeexo, waxa kale oo aanu halkan ku cadaynaynaa in aanu diyaar u nahay fulinta iyo ku dhaqanka xeerka aynu halkan ku saxeexayno iyo xeerarka kale ee doorashooyinka iyo Shuruucda kale ee dalka,  qoladayada xisbul xaakima ee Sharciyadan lagu xakamaynayo ee la soo eegayaanu nahayoo Komishanku waa kuwan halkan ka cadeeyey ururrada iyo axsaabtuna goob joog ban ka wada ahayn in looga baahan yahay Madaxweynuhu inuu saxeexo in aanay cid-na isticmaali karin hantida qaranka cida laga ilaalinayaana waa qoladda xisbul xaakimka, taana waxaanu balan-qaadaynaa in aan naloogu iman wax  hanti qaran oo aanu isticmaalayno”

 

Waxa kale oo iyaguna Shirkaasi ka hadlay Masuuliyiinta Xisbiga UCID, Xaqsoor iyo Umadda oo dhamaantood sheegay inay diyaar u yihiin xeerka anashaxa doorashooyinka goleyaasha deegaanka, halka Guddoomiyaha Urur Siyaasadeedka Nasiye Axmed Muxumed Cumar (Axmed Talyaani) ayaa sheegay inay gabi-ahaanba qaadaceen Doorashada golaha deegaanka.

 

Buraan News.com/Hargeysa

 

Comments are closed.

WARARKII