Madaxdhaqameed ka soo Jeeda Aqooyiga Hargeysa oo si cadho leh uga hadlay Qorshe Xukuumaddu ka damacsantahay Deegaamada Waqooyiga Hargeysa

September 24, 2012 - Written by reporter1 - Edited byreporter1

Madaxdhaqameed ka soo jeeda Deegaanadda Waqooyiga Hargeysa, gaar ahaa beesha H Sacad Muuse , ayaa si weyn ugu qayliyay  go’aan ay xukuumada Somaliland  ku doonayso in xal loogu raadiyo khilaafka   ka taagan dhulka lagu  muransan yahay ee u dhexeeya gobolada Awdal iyo Marood-jeex, iyaga oo arrintaas ku tilmaamay jawrfal siyaasadeed  oo lagula wareegayo  dhul ay hore ugu noolaan jireen.

 

Sallaadiin iyo  wargaradka kale oo maanta shir jaraa’id ku qabtay  hotel-ka Guuleed ee Magaalada Hargeysa , ayaa sheegay in aanay aqbali doonin  natiijada ka soo baxda  qorshaha xukuumada, waxaana ay ku goodiyeen  in ay qaadi doonaan tallaabo ay dib ugu qabsan doonaan dhulkaas.

Suldaan Ibraahim Suldaan  Sulub boo ka mid ahaa  Sallaadiinta ka hadashay shirka jaraa’id, ayaa  ku eedeeyay wasiirka arrimaha gudaha Maxamed Nuur Caraalle (Duur)  oo dhawaan Madaxweyne Siilaanyo u gudbiyay qoraal  uu kaga talo bixinayo  xalka dhibaatan jirta, in uu masuul ka yahay  muran soo cusboonaday. “ Kala xadayntu  dalku waa sidii 1960-kii  ee dastuurku tilmaamayo , sidaa si aan ahayn oo meesha taallaa ma jirto , aniga oo tixraacaya nin wasiir ah  oo malin dhaweyd dhuumasho ku soo galay  Lughayaha iyo Cabdi Geedi , ayaa waxa uu yidhi Madaxweyne   guddi shan qof ah ha loo saaro , taa waxa aan leeyahay meeshu maaha  laba baloodh oo la isku hayso waa dhul ballaadhan  oo ah 800 KM oo Sq  ah  oonu leenahay anagu weeyi , cid aanu ku wada hadli karnanaa ma jirto  dhulka iyo dalka waa kala leeyahay dhulku waa Somaliland haddan waa kala leeyahay . Dhulkaa Waqooyiga   gobolka Hargeysa illaa xeebtiisa iyo Gabiley  aan ku gor-gortami karnaa ma jirto , ninka leh xabaalo ayaad ku sheeganaysaan , anigu xabaalo ayaanu ku sheeganaynaa waxa aanu leenahay aduu wax aad ku sheeganaysaa ma jirto , nimankan halkan ka hadlaya waxa aan leeyahay meelihii aad ka timaadeen iyo Harawo ku noqda.” Ayuu yidhi  Suldaan Ibraahim Sulub.

Suldaan Mawliid Cali Sabayso , ayaa   sheegay in Madaxweyne ku xigeenka Somaliland Cabdiraxmaan Cabdilaahi Saylici , uu yahay xudunta  mushkilada dhulkaas, iyada oo ay xasaasiyadi ka dhalatay booqasho uu sannadkan gudihiisa ku tagay xeebaha gobolada Saaxil iyo Awdal.“ Duur  ayuunbaad tilmaaysanaa  Madaxweyne ku xigeenka halkan fadhiya ayaa horta   hawshan wada, xildhibaanaa wada, Sallaadiinbaa wada , odayaal baa wada, aqoonyahanaa wada beenbaana loo sheegay , wax anigu yay inagu xidhan yihiin , waxna  Siilaanyo yay ku xidhan yihiin  waxna Samaroonbay dan u yihiin , wax aniga yay inagu xidhan yihiin cida waxeedii  muranka la gelinayaa waa inaga , taasi kolba halka ay inagu isdhigno ayuunbay wax ku soconayaan  , Madaxweyne ku xigeenku  halkaas  inta uu ka cararay  xeebtuu ka wareegay  Mashruuca kalluumaysiga kii Ina Aw Siciid ee caalamiga ahaa  ninka ka hawlgalay ee horjoogsaday waa Saylici” Ayuu yidhi  Suldaan Mawliid Sabayso.

 

Waxa kale uu ka hadlay kulan ay la yeesheen madax-dhaqameedka beeshiisu Madaxweyne Siilaanyo oo  ay kaga hadleen dhibaatada deegaanada Waqooyi.“ Laba qodob ayuun baanu kuugu nimid Madaxweyne , anaga dhulka waxba nagama yaallaan , Gudabuursina ku murmayno gobolka Maroodi-jeex  Baddiisa , Hargeysa noo dhex wareegaysan maayaan , halkaana  kharbudi maayaan oo dadkayaga camaalaq la daba socon maayaan , adaa noo dhexeeya  na kala hag, haddii kale anagaa ka iska qabanayna , waxbaan ka qabanayaa ayuu yidhi waxna kuuma qaban  , jawaabtu waxa ay noqotay in Duur inta uu Koonfur Afrika ka soo duulo  Lughaya inlagu casuumo  oo uu fadhiyay oo dad gawaadhi lagu soo guray  oo la keenay Cabdi  Geedi  oo la geeyay Ceel –Lahelay oo yidhi Duur marka uu idin soo maro gacmaha  taagay”

Buraannews.com/Hargeysa

 

 

Comments are closed.

WARARKII